Hengekøye i solnedgang Kristine Sofie Orheim Hansen

Hornindal frivilligsentral og Fjellreven 4H inviterte til fellescamp i Groparken i Hornindal natt til søndag. Det var duka for kveldsmat på bål, ulike aktivitetar og overnatting, til glede for både store og små. 4H hadde med informasjonsmateriell om klubben, og viste at det kan vere både enkelt å kjekt å campe. Til saman 9 telt og to hengekøyer var å finne i parken denne natta, under stjerneklar himmel og måneskin.

Marit Grenlund var glad for at ho tok turen, og seier at ho gjerne skulle sett at fleire deltok på slike arrangement. Ho hadde med seg dottera Live og ei veninne, som sov i tretelt for første gong. Her var det veldig fint å sove, seier Live. Telt og sovepose fekk dei låne i BUA Hornindal, som var open for anledninga.

Då telta var slått opp delte Stig Ulv mjuke tonar og dikt, med solnedgangen som bakteppe. Det var ei veldig fin og idyllisk oppleving, sa ein av dei besøkande. Og ungane storkosa seg med badminton og jenga medan Stig spelte. Etterpå vart det marshmallows, laurdagsgodt og kortspel ved bålet.

Arrangørane er svært godt fornøgd med arrangementet, og er glad for at det vart ei kjekk oppleving for alle som var med! Å kome seg ut i friluft er både godt, lærerikt og sunt!