Lån eit nettbrett

Vil du prøve nettbrett før du kjøper?

No kan du låne nettbrett gratis på Volda bibliotek.

Målet med ordninga er å gi fleire seniorar moglegheit til å prøve ut nettbrett og bli tryggare på digitale tenester i kvardagen.

Du treng ikkje å eige nettbrett frå før. Dette er eit lågterskeltilbod for deg som er nyfiken og ønskjer å lære meir.

Kvifor låne nettbrett?

Eit nettbrett gjer det enklare å:

  • halde kontakt med familie og vener
  • lese aviser og finne informasjon
  • ta del i videosamtalar
  • bruke appar og digitale verktøy i kvardagen

Mange opplever at nettbrett er enklare å bruke enn både mobil og datamaskin.

Kven kan låne?

Ordninga er retta mot seniorar (innbyggarar frå 65 år) som ønskjer å prøve nettbrett over ei periode før dei eventuelt kjøper eige.

Kor lenge kan eg låne?

Vanleg lånetid er to veker.

Dersom det er ledige nettbrett, kan lånet i enkelte tilfelle forlengast etter avtale.

Kva kostar det?

Det er gratis å låne nettbrett.

Ved første utlån må du inngå ein enkel utlånsavtale.

Utlån og innlevering

Utlån og innlevering skjer på Volda bibliotek.

Biblioteket kan også hjelpe deg med å kome i gang dersom du har spørsmål om grunnleggjande bruk.

Meld interesse

Vil du låne nettbrett?

Møt opp i skranken på biblioteket.

Tilbodet startar opp i veke 3.

Om prosjektet Fleire digitale eldre

Volda kommune er ein av tre pilotkommunar i prosjektet Fleire digitale eldre, leia av Senteret for eit aldersvennleg Noreg.

Målet er at fleire eldre skal kunne delta i det digitale samfunnet på ein trygg, sjølvstendig og aktiv måte. Gjennom utprøving av enkle og praktiske tiltak skal prosjektet bidra til auka digital kompetanse, meistring og inkludering. Erfaringane frå pilotkommunane skal danne grunnlag for løysingar som kan takast i bruk av kommunar over heile landet.

I prosjektet blir tre tiltak prøvde ut:

  • Digital opplæring heime – individuell rettleiing i eigen heim.
  • Digitale saman – sosiale møteplassar der deltakarane kan lære digitale ferdigheiter saman med andre.
  • Bli digital – lån eit nettbrett – utlån av nettbrett slik at fleire kan øve i sitt eige tempo.

Tiltaka skal gjere det enklare å få hjelp på den måten som passar best for den enkelte. Nokre ønskjer rettleiing heime, andre lærer best saman med andre, medan nokre vil utforske digitale løysingar på eiga hand.

Pilotperioden varer i minst seks månader. Undervegs blir tiltaka evaluerte, og erfaringane frå kommunane skal bidra til å utvikle gode og varige tilbod som kan kome eldre til gode – både lokalt og nasjonalt.

Sist endra 03.08.2026 11:00