Kommunikasjonsstrategien til kommunen er det overordna styringsverktøyet for all kommunikasjon i og frå kommunen. Strategien gjeld for alle tilsette, og skal vere eit hjelpemiddel for å kommunisere internt og eksternt. Strategien definerer prinsipp, målgrupper og mål. 

Kommunikasjonsstrategien er utarbeidd av faggruppa for kommunikasjon på Søre Sunnmøre.

Han er vedtatt av kommunedirektøren si leiargruppe i kvar kommune.

Kommunedirektøren har det overordna ansvaret for strategien. 

Dokumentet skal reviderast ved behov. 

Kommunane har ein lovpålagt plikt til å informere aktivt om verksemda vår, skrive klart og korrekt og gjere all informasjon universelt utforma.  

Målet med kommunikasjonsarbeidet er  

• at innbyggarane og dei tilsette får informasjon om rettane sine, pliktene sine og tenestene i kommunen
• at innbyggarane og tilsette får delta i avgjerdsprosessane i lokaldemokratiet
• at folk vil bu, jobbe og engasjere seg i kommunen og regionen
• å skape tillit og tryggleik 

Prinsippa for kommunikasjonen vår er våre felles grunnreglar for korleis vi kommuniserer. Desse prinsippa bidreg til at vi blir oppfatta som og kommuniserer som éin organisasjon. 

Ei målgruppe er ei definert gruppe menneske vi ønsker å nå ut til når vi kommuniserer.  

Kommunen har ulike roller – som tenesteytar, myndigheitsutøvar, lokaldemokratisk arena og samfunnsutviklar. Kven som er målgruppe, og korleis vi kommuniserer, vil variere etter kva rolle kommunen utøver. 

Innleiing

Volda kommune sin kommunikasjonsstrategi skal støtte opp om og bidra til å nå dei overordna måla som er fastsette i kommunen sine planar og styringsdokument.

Kommunikasjonsstrategien har ikkje eigne mål uavhengig av kommunen sine mål, men er eit verkty for å fremje dei fire satsingsområda: vekstkraft og attraktive lokalsamfunn, livskvalitet og meistring, grøn omstilling og organisasjonsutvikling. Gjennom open, tydeleg og inkluderande kommunikasjon skal kommunen styrkje tillit, medverknad og samskaping, og sikre at innbyggjarar, tilsette, folkevalde og samarbeidspartnarar har god tilgang til informasjon og moglegheit til å delta i utviklinga av voldasamfunnet.

Vekstkraft og attraktive lokalsamfunn

Volda kommune skal vere ein attraktiv stad å bu, arbeide og skape verdiar. Dette inneber å styrkje lokalsamfunna, leggje til rette for næringsutvikling, kultur, frivilligheit og møteplassar, og bidra til positiv befolkningsutvikling. Kommunikasjonen skal støtte opp om dette ved å synleggjere moglegheiter, aktivitetar og tilbod i kommunen, formidle utviklingsarbeid på ein open og tillitsskapande måte og leggje til rette for dialog og medverknad frå innbyggjarar, næringsliv og andre aktørar.

Livskvalitet og meistring

Målet er at barn, unge, vaksne og eldre i Volda kommune skal oppleve tryggleik, tilhøyr, deltaking og meistring i kvardagen. Kommunen skal fremje folkehelse, førebygging, tidleg innsats, inkludering og like moglegheiter for alle. Kommunikasjonen skal vere tydeleg, forståeleg og tilgjengeleg, og bidra til at innbyggjarane får kunnskap om rettar, tenester, aktivitetar og moglegheiter som støttar meistring, læring og god livskvalitet – også for dei som ikkje har digital kompetanse.

Grøn omstilling

Volda kommune skal bidra til å møte klima- og miljøutfordringane gjennom å redusere klimagassutslepp, ta vare på natur og tilpasse seg klimaendringane. Målet om minst 55 % reduksjon i direkte utslepp innan 2030 ligg til grunn for arbeidet. Kommunikasjonen skal formidle mål, tiltak og resultat på ein forståeleg måte, skape medvit og engasjement, og leggje til rette for at innbyggjarar, næringsliv og organisasjonar kan bidra aktivt i den grøne omstillinga.

Organisasjonsutvikling

Volda kommune skal vere ein føreseieleg, attraktiv og lærande organisasjon, forankra i verdiane raus, modig, kompetent og lærande. Målet er å ha tydelege roller, meistringsorientert leiing, god delingskultur og høg tillit internt og eksternt. Kommunikasjonen skal støtte openheit, god informasjon, involvering og forståing for prioriteringar og rammevilkår, og bidra til eit levande lokaldemokrati med brei deltaking og representasjon.

Hovudmål:

Vi legg til rette for arbeidsplassar og busetnad, og styrker den regionale posisjonen.

Delmål:

• Vi legg til rette for folk som vil busetje seg i kommunen gjennom å ha gode og nære barnehagar og skular, tilgjengelege bustader og ein variert arbeidsmarknad.
• Vi legg til rette for næringsutvikling og er ein attraktiv lokaliseringsstad for ulike type bedrifter, organisasjonar og offentlege verksemder.
• Volda sentrum som hovudsenter skal vere eit attraktivt og særprega sentrum for handel, busetting, besøk og aktivitet.
• Vi utviklar kommunen til ein særeigen reiselivsdestinasjon, bygd på identitet, natur og autentiske opplevingar.
• Gjennom samskaping og samarbeid legg vi til rette for kulturliv, aktivitetar og møte mellom folk både ute og inne.
• Vi skal ha god teknisk og digital infrastruktur i heile kommunen.

Hovudmål

Volda kommune sine innbyggjarar opplever fleire leveår med god helse og trivsel og reduserte sosiale forskjellar

Delmål

Vi vidareutviklar tenester og lokalsamfunn slik at fleire opplever meistring og fellesskap.

Vi prioriterer tidleg innsats, helsefremmande og førebyggande arbeid.

Vi skal ha eit aldersvenleg samfunn, og innbyggjarar skal kunne bu lengst mogleg i eigen heim.

Vi skal ha gode bu- og oppvekstmiljø, meir leik og god tilgang til aktivitets- og friluftsområde.

Gjennom samarbeid og samskaping legg vi til rette for brei deltaking, sterke fellesskap og inkluderande lokalsamfunn i heile kommunen.

Hovudmål

Voldasamfunnet skal redusere klimagassutsleppa, og tilpasse seg konsekvensane av klimaendringane. Voldasamfunnet sine direkte klimagassutslepp skal i 2030 vere redusert med minst 55 % samanlikna med 2009.

Delmål

Vi gjer det meir attraktivt å gå, sykle, reise kollektivt og køyre utsleppsfritt.

Vi legg til rette for eit kortreist kvardagsliv og tek i vare og utviklar viktige kultur-, natur-, frilufts- og landbruksverdiar.

Vi energieffektiviserer eksisterande bygg, legg til rette for fornybare energiløysingar og legg vekt på låg energibruk og låge klimagassutslepp ved nye utbyggingar.

Vi reduserer forbruket, gjer klimavenlege innkjøp og sikrar at avfall gir verdi.

Vi arbeider målretta med samfunnstryggleik og beredskap og gjer samfunnet i stand til å handtere klimaendringane.

Hovudmål

Volda kommune er ein føreseieleg og tydeleg aktør i alle sine relasjonar, og innbyggjarane og tilsette skal oppleve tillit til kommunen

Delmål

Volda kommune har ein tillitskultur med tydelege ansvarsliner.

Meistringsorienterte leiarar bygger ein kultur og eit meistringsklima der tilsette har høg grad av meistringstru.

Volda kommune utviklar ein heiltidskultur, som har fokus på kvalitet i tenestene, god rolleklarheit og helsefremmande arbeidsplassar.

Volda kommune forvaltar sin økonomi i tråd med politiske prioriteringar og innanfor økonomiske løyvingar.

Vi skal ha eit levande lokaldemokrati prega av openheit, tillit, god informasjon og aktiv involvering av innbyggjarar.

Volda kommune styrkar demokratiet ved å bygge avgjerdene på kunnskap og involvering, der konsekvensane er belyste.