F.v.: Bjørn Heggen, Fred Igland og Paul Ottar Tornes. Volda kommune

Politisk forankra satsing på digital inkludering i Volda og Ørsta

Volda og Ørsta kommunar har fått til saman 1,6 millionar kroner til ei felles satsing på digital inkludering. Målet er å styrkje digital deltaking, kompetanse og tryggleik for innbyggjarane i regionen.

Volda formannskap vedtok samrøystes 11. juni 2024 å søkje Digitaliseringsdirektoratet om midlar til å etablere eit permanent interkommunalt rettleiingstilbod for auka digital deltaking og kompetanse. Ørsta kommune gjorde tilsvarande vedtak. No er satsinga ein realitet.

Kommunane har fått tildelt 1 000 000 kroner frå Digitaliseringsdirektoratet til prosjektet «Digital kvardag – meistring for alle». I tillegg har Sparebankstiftinga Søre Sunnmøre løyvd 600 000 kroner til ei særskild satsing på barn og unge.

– Dette er eit politisk forankra og langsiktig løft for digital inkludering i regionen. Vi byggjer både kompetanse, fellesskap og tryggleik i den digitale kvardagen, seier Paul Ottar Tornes, avdelingsleiar for innovasjon og digitalisering i Volda kommune.

Full aktivitet sidan hausten 2025

Prosjektet er godt i gang, og fleire tiltak har allereie vore gjennomført. 

Sprek på nett – fullt hus annankvar veke

Den 29. oktober 2025 starta «Sprek på nett» opp igjen, både i Volda og Ørsta. Tilbodet går annankvar veke i begge kommunar, og samlar mellom 20 og 40 deltakarar kvar gong.

Her tek ein opp tema deltakarane sjølve ønskjer opplæring i – frå Vipps og nettbank til digital tryggleik og bruk av offentlege tenester. Tema vert repetert ved behov.

–Det er mange av dei same kursdeltakarane som kjem att på kursa, men det dukkar òg stadig opp nye andlet. Vi merkar at deltakarane har blitt meir sjølvgåande. Når vi no skal laste ned ein app på kurset, treng dei mykje mindre hjelp, fortel Fred Igland, som held Sprek på nett-kursa.

– Tiltaket har òg ei viktig sosial side, med enkel servering finansiert gjennom prosjektmidlane. Tilbakemeldingane er gode, og mange opplever både meistring og eit verdifullt sosialt møtepunkt.

Generasjonsbru – ungdom og eldre møtest

Gjennom valfaget «Innsats for andre» har elevar i Volda denne vinteren gjennomført digitale møte med eldre.

Elevane fekk fridom til å planleggje øktene sjølve. Små grupper på 2–4 elevar hadde ansvar for både innhald og gjennomføring, og fleire bidrog også med planlegging og enkel servering.

Møta var uformelle og prega av gode samtalar og praktisk hjelp. Ein eldre mann fekk støtte til å kome i gang med ny PC og ei dame fekk hjelp til å bruke Vipps.

Både elevar og deltakarar opplevde tiltaket som meiningsfullt. Erfaringane viser at eigarskap hos ungdomane er ein viktig suksessfaktor.

Ørstaskulen startar opp tilsvarande generasjonsbru-arbeid frå hausten 2026. Då blir tiltaket fullt ut interkommunalt.

KI i aksjon – stor interesse

I samarbeid med det lokale selskapet Brain XR AI har kommunane arrangert opne KI-dagar.

I Volda deltok om lag 10 personar på ei tett og praktisk økt før jul. I Ørsta, rett over nyttår, var interessa svært stor – over 100 personar møtte opp.

Deltakarane fekk teste og trene eigne KI-modellar, prøve robotarmar og sjå korleis kunstig intelligens fungerer i praksis. Erfaringa viser at framtidige arrangement bør ha påmelding for å sikre best mogleg læringsutbytte.

Stor satsing på barn og unge

Kommunane har signert samarbeidsavtale med Stiftelsen Barnevakten. Avtalen omfattar 13 offentlege skular i Volda og Ørsta og skal gjennomførast i 2026 og 2027.

Gjennom temaforedrag, kveldsskular, læraropplæring og workshops skal ein:

• styrkje digital dømmekraft hos elevar
• gi foreldre konkret hjelp med foreldreinnstillingar
• auke lærarkompetansen
• bidra til ein tryggare digital oppvekst

Sparebankstiftinga Søre Sunnmøre har støtta denne satsinga med 600 000 kroner.

– Digital tryggleik for barn og unge er noko av det viktigaste vi kan investere i no. Vi ønskjer å gi både foreldre og skular betre verktøy i ein stadig meir kompleks digital kvardag, seier Tornes.

Dette skjer framover

Satsinga held fram med:

• vidareføring av «Sprek på nett»
• oppstart av generasjonsbru i Ørstaskulen hausten 2026
• full utrulling av Barnevakten-tilbodet i skuleåret 2026/27
• utvikling av kunnskapspakkar for kommunalt tilsette
• foredrag om Digital arv ved Seniornett 22. april på Ørsta Samfunnshus

Målet er å etablere eit permanent interkommunalt lågterskel rettleiingstilbod etter prosjektperioden.

Ein meir inkluderande digital kvardag

«Digital kvardag – meistring for alle» handlar om meir enn opplæring. Det handlar om å redusere utanforskap, styrkje demokratisk deltaking og sikre at alle innbyggjarar kan bruke digitale tenester på like vilkår.

Med politisk forankring, statlege midlar og sterkt lokalt engasjement tek Volda og Ørsta eit tydeleg ansvar for digital inkludering i regionen.

God kommunalt samarbeid

– Vi ser verdien av det arbeidet Fred har gjort gjennom fleire år, først i Ørsta og seinare etter at Volda vart med. Det har vist seg å vere eit tydeleg behov for dette tilbodet, seier Bjørn Heggen, digitaliseringsleiar i Ørsta kommune.

– Vi er takksame for at Volda har søkt og fått midlar, og at vi er med og samarbeidar, seier Heggen. 

– Vi har sett at det er behov, og at tiltaket fungerer godt. No kan vi utvide og styrkje det, og halde fram med arbeidet over lengre tid.