Kjære medarbeidar i Volda kommune,

Rett før helga sende ordførarane søknad om statleg tilskot til utgreiing av kommunesamanslåing. Det handlar om å få eit faktagrunnlag for å vurdere fordelar og ulemper med ei eventuell samanslåing av kommunane Volda og Ørsta. Statsforvaltaren har allereie sendt søknaden vidare til Kommunaldepartementet og støttar at departementet løyver midlar. Det foregår ein parallell prosess mellom kommunane Herøy, Sande og Ulstein.  

I formannskapsmøtet tysdag var saka om Folkestad barnehage den enkeltsaka politikarane brukte mest tid på. Dette er ei sak som opptek foreldre og de som jobbar der. Administrasjonen er i dialog både med foreldreutval og tilsette med sikte på å finne tilfredsstillande løysing. Formannskapet ba om at administrasjonen utgreier nærare ulike alternativ.

I leiargruppa mi denne veka hadde vi besøk av avdelingsleiar Kari-Janne Ljones Kulø, som orienterte om tenestene  i avdelinga for barn og familie, herunder erfaringane så langt med FUS-teamet (familie- og ungdomsstøtte). Dette er ei viktig teneste som Volda tidlegare mangla, og som dekkjer eit viktig behov hos familiar, barn og unge i kommunen. Tenesta er presentert i videoen nedanfor  - som mange kanskje allereie har sett – men verdt å sjå ein gong til https://youtu.be/X0WyrAea8zs

Leiargruppa mi hadde også besøk av prosjektgruppa i TØRN som presenterte status i heiltidskulturarbeidet. Dette arbeidet er godt i gang i heile helse- og omsorgssektoren. Det vert gjort ein stor innsats, og det er tydeleg at alle avdelingane er i god utvikling. Dette har eg tru på, og etter kvart vil vi hauste gode erfaringar hos brukarane og i arbeidsmiljøa. 

Vi hadde også besøk av Paul Ottar Tornes og Sonja Håvik som orienterte om løysing for krisekommunikasjon, og kva vi må jobbe med framover for å auke beredskapen til kommunen.

Eg har sett av tid framover til å besøkje ulike arbeidsplassar. Det er kvalitetstid for meg å møte dykk som driv med direkte tenesteyting. Denne veka deltok eg på to personalmøte ved Volda Omsorgssenter - Karve-/Ottastova og Kleppe-/Piletunet.

Dette var to svært positive møte. Tilsette som brenn for jobben og er medvetne om at dei er til for brukarane. Dei jobbar godt med utviklingsarbeidet i TØRN-prosessen, risikoanalysar og har fokus på verdiar og kollegastøtte. Eg vart også imponert over kor godt ein også jobbar på tvers av avdelingane for hjelpe kvarandre når det trengst. Eg fekk også ei innsikt i kvardagen deira, utfordringar og korleis dei jobbar for å løyse desse. Eg opplever også at det er god forankring omkring overtidsbruk og  budsjettansvar.

Personalgruppa Karve-/Ottasstova Rune Sjurgard

Personalgruppa Kleppe- piletunet Rune Sjurgard

God helg!

Beste helsing  

Rune Sjurgard