Volda kommune

Arbeidet skal sikre moderne og tilrettelagte lokale for både Volda kommune og Helse Møre og Romsdal innan sommaren 2026.

I samband med ei større transformering av Hamna 20, flyttar Hamna dagsenter midlertidig inn i Ivar Aasen-bygget frå 8. september. Flyttinga skjer som eit ledd i klargjeringa av bygget, der både første og andre etasje skal gjennomgå omfattande betongrehabilitering og teknisk oppgradering

Arbeidet i Hamna 20 inneber både støy og krevjande bygningsmessige inngrep, særleg i samband med betongrehabilitering. Dette gjer det utfordrande å oppretthalde drifta i dagsenteret samtidig som oppgraderinga pågår. For å sikre ei effektiv framdrift og ferdigstilling av både første og andre etasje innan sommaren 2026, har vi valt å gjennomføre arbeidet parallelt i begge etasjar. Dette er også den mest økonomisk fordelaktige løysinga for kommunen, seier eigedomssjef Kjell Magne Rindal i Volda kommune.

I 2026 vil Hamna 20 stå ferdig som eit moderne kontorbygg. Helse Møre og Romsdal skal flytte inn i nye lokale i andre etasje, medan Hamna dagsenter får nye, tilrettelagte lokale i første etasje.

Vi er svært nøgde med at vi har funne ei mellombels løysing som både er funksjonell og trygg for brukarane våre, seier avdelingsleiar bu og habilitering Elisabeth Sandnes.

Det mellombelse lokalet i Ivar Aasen-bygget, som i utgangspunktet skal rivast i samband med etableringa av Aasen kvartalet, har no fått tilført både straum og vatn. Bygget vil vere klart for bruk frå 8. september, og opninga av det mellombelse dagsenteret er planlagd til 15. september.

Prosessen er eit resultat av godt samarbeid mellom Sektor helse og omsorg og Sektor samfunnsutvikling i Volda kommune.