På bilete frå venstre: Ordførar Sølvi Dimmen, jordmor Gunvor Bergem Lia, kommunedirektør Rune Sjurgard, leiar for interkommunalt barnevern Aina Øyehaug Opsvik, kommunalsjef oppvekst Per Ivar Kongsvik, rådgjevar KORUS Annika Linge Hessen og koordinator tidleg innsats Marthe Longva Strandbakken
Victoria Sørensen
Målet med samlinga er å fortsette implementerings arbeidet med samhandlingsmodellen BTI (Betre tverrfagleg innsats) i arbeidet til kommunen for barn og unge. Alle barn skal ha det det bra heime, i barnehagen, på skulen og på fritida. I Volda kommune skal det vere trygt og godt å vekse opp. Likevel kan det oppstå utfordringar og vanskar som gjer at ikkje alle har det så bra. Derfor skal vi arbeide etter modellen BTI (Betre tverrfagleg innsats) i Volda, for å sikre at alle barn, unge og familiar skal få den hjelpa dei treng, og at ein har flyt i tenestene ein leverer.
– «Det skal være trygt og godt å vekse opp i Volda. Betre tverrfagleg innsats, BTI, er tidlegare forankra politisk, og det er kjekt å sjå kor mange som møter opp på dette og engasjerer seg.»
Ordførar Sølvi Dimmen opna dagen med fleire gode ord om dette arbeidet kommunen har halde på med i snart 2 år. Kommunedirektør Rune Sjurgard sa mellom anna at det arbeidet ein gjer innan barn og unge er både prioritert i kommunen og eit svært viktig arbeid.
Målgruppa for denne andre samlinga var tilsette i oppvekstsektoren og andre som jobbar tett på born og unge. Over 60 tilsette var tilstades.
Tema for dagen var nivå 2 og 3 i BTI-handlingrettleiaren som inneber tverrfagleg samhandling og dei meir komplekse sakene.
Jordmor, Gunvor Bergem Lia heldt eit innhaldsrikt innlegg om svangerskapsomsorga i Volda kommune. Ho forklarte kvifor det er viktig å satse på denne gruppa tidleg slik ein sikrar ein god start i familielivet, som vil prege oppveksten.
Vidare heldt Aina Øyehaug Opsvik, leiar for interkommunalt barnevern eit innlegg om «Samarbeid til barnets beste».
– «Samhandling er ikkje like enkelt som det ser ut til, men vi er pliktige til gjer det, og når vi får det til er det til det aller beste for barnet og familien». Viktigheita av å inkludere føresette heile vegen blei også satt i fokus. Pål Inge Olsen frå politiet var også tilstades og snakka om kor viktig det er at ein jobbar både tverrfagleg og tverretatleg, det vil kome innbyggjarane våre til gode.
Rådgjevar for KORUS, Annika Linge Hessen viser til rapportar som seier at ein etter implementering av BTI-modellen løyser saker på nivå 0 og 1 betre enn tidlegare, vi har fortsatt ein veg å gå. Koordinator tidleg innsats, Marthe Longva Strandbakken løfta fram kor viktige dei tilsette i barnehage, på skulen, på helsestasjonen og i barnevernet er, – og ofte er den eine som ser.
– Kvifor barn, unge og familiar ikkje har det bra er kompleks, og ein veit ikkje alltid kvifor, men det å være den eine som ser kan være den eine som løyser situasjonen.