Kommunen meiner det er viktig å bevare samfunnshuset, og er godt fornøgd med den inngåtte avtalen.

Vi ser fram til at bygget no skal få nytt liv til glede for folk i Volda, både unge og vaksne, sa ordførar Sølvi Dimmen.

Avtalen er eit resultat av eit omfattande og langvarig arbeid både frå kommunen og entreprenøren si side. Kommunen har i lang tid jobba med å utarbeide nødvendig dokumentasjonsgrunnlag og førebu anskaffingsprosess, og entreprenøren har på si side gitt innspel til dokumentasjonsgrunnlaget, utarbeida tilbod og delteke i forhandlingar.

Ombyggingsjobben skal etter planen starte 1. november i år og sluttførast seinast 1. august 2024. Samfunnshuset skal etter ombygginga primært ha tre funksjonar:

1.    Ungdomsklubb
2.    Kino
3.    Forsamlings- og festlokale

I fyrste etasje skal det i halvdelen mot storgata bli bygd nytt forsamlings- og festlokale, nytt toalettområde og personalrom. Forsamlings- og festlokalet skal både bli nytta til å arrangere kommunestyremøte og til utleige for publikum. Foajeen skal i hovudsak bestå, med unntak av området der det i dag er kinokiosk. Dette området skal etter planen bli innarbeidd i nytt forsamlings- og festlokale. I halvdelen mot Uppheim skal det bli bygd ungdomskafé og spelerom som ein del av den nye ungdomsklubben. I bygget si mellometasje mot Uppheim skal det bli  bygd eit moderne «gamingrom» med datamaskiner og andre spelkonsollar, – også som ein del av ungdomsklubben. I bygget si andre etasje skal det bli bygd ny kino med kiosk og loungeområde i området der kinosalen er i dag. På dagens scene skal det for ungdomsklubben bli bygd eit rom for dans og teater og eit sminkerom. Utover dette skal det også bli gjort ein del teknisk arbeid, blant anna knytt til drenering og utbetring av botnleidningane.