F.v.: Fred Igland, kurshaldar, Paul Ottar Tornes, leiar digitalisering og Hanne Grindalmen, biblioteksjef er klar for kurs.
Volda kommune | Bente Engeseth
Gratis kurs
Tilbodet er heilt gratis, og utan påmelding! Det er heilt uforpliktande å delta!
– I ei tid der digital teknologi blir stadig meir sentral i kvardagen vår, er det viktig at alle i samfunnet har naudsynte ferdigheiter til å kunne navigere i den digitale nye verda. "Sprek på nett" er eit steg mot å sikre at ingen blir ståande utanfor den digitale utviklinga, seier Paul Ottar Tornes, leiar digitalisering i Volda kommune.
Kommunen har som mål å gje innbyggarane kunnskap og rettleiing for å kunne oppleve meistring og tryggleik i det digitale, både på data og mobil.
– Vi har søkt og fått støtte frå Kommunal- og distriktsdepartement, seier digitaliseringsleiar Paul Ottar Tornes. Formålet med stønadsordninga er å legge til rette for etablering av eit gratis lågterskel rettleiingstilbod for alle som har lita eller ingen digital kompetanse. Det betyr at alle som ønsker det vil få moglegheita til å kome på kurs for å få grunnleggande digital kompetanse, i tillegg til erfaring og tryggheit til å lære seg bruk av digitale tenester i eigen kvardag.
Tilskotsordninga støttar opp om regjeringa og KS (Kommunesektorens organisasjon) si felles målsetting om å bidra til at alle innbyggarar skal ha tilgang til eit lågterskeltilbod innan digital kompetanse.
Introduksjonsmøte
- STAD: Volda folkebibliotek
- DAG: Torsdag 18. januar
- TID: 11.00–13.00
Kurs annankvar fredag
Det vert ein serie av kurs annankvar fredag klokka 11.00–13.00 med oppstart fredag 26. januar.
Desse kursa vil fokusere på grunnleggjande datakunnskap og nyttige applikasjonar for mobiltelefonar og nettbrett.
– Det vert mogleg å kome med ønske til tema for desse kursdagane undervegs for dei som deltek, seier ein engasjert Paul Ottar vidare.
Sosial møtestad
Deltakarane vert oppmoda til å ta med eige utstyr som mobiltelefon, nettbrett eller PC/MAC til kursa. Det er ingen påmelding, og kursa er uforpliktande å delta på – du kan altså prøve ein gong utan å forplikte deg til vidare deltaking. Deltakarane vil få enkel servering av gratis kaffi, te og noko å bite i.
Vi håper at kursa vert populære og at mange kjem.
Vil du vite meir?
For meir informasjon om "Sprek på nett" og det komande introduksjonsmøtet, ta kontakt med Volda folkebibliotek!
Kom innom i opningstida, eller ring oss på tlf.: 70 05 88 50! Du når oss også på e-post: biblioteket@volda.kommune.no