Kommunane på Søre Sunnmøre har fått gjennomført ei grundig strategisk vurdering av den digitale tenesteutviklinga og IT-drifta. Analysen er utført av Tellmann Executive Advisors.

Kommunedirektørane på Søre Sunnmøre ønskte ei uavhengig analyse av dagens situasjon på drift og utvikling innanfor IKT, digitalisering og kommunal tenesteutvikling, og ei oversikt over ulike handlingsalternativ.  

På grunn av den raske utviklinga innan IT-teknologi og behovet for økt endrings- og effektiviseringstakt, har kommunedirektørane på Søre Sunnmøre tatt initiativ til ei uavhengig analyse av dagens situasjon innan IT, digitalisering og tenesteutvikling. Tellmann Executive Advisors vart tildelt oppdraget med å gjennomføre den strategiske vurderinga. 

Resultatet er ei grundig analyse av dagens situasjon innanfor IT, digitalisering og tenesteutvikling i kommunane, i tillegg til ein presentasjon av ulike handlingsalternativ som kan bidra til å auke endrings- og effektiviseringstempoet.

Analysen inkluderer strategiske vurderingar som val av retning, kostnadseffektiv drift, tilgang til nye teknologiar, fleksibilitet, systemkompetanse, IT-support, kontroll og sikkerheit, innovasjonstakt og samarbeid på tvers av kommunane. 

Kommunane på Søre Sunnmøre gjorde eit strategisk viktig val i 2017 då vi samla kvar våre små IT-miljø i eit interkommunalt selskap i Søre Sunnmøre interkommunale IKT-samarbeid (SSIKT).

Gjennom SSIKT fekk kommunane ein samla driftsfunksjon med høg tilgjengelegheit, god sikkerheit og stabil drift. I dag er det ei svært rask teknologisk utvikling og samfunnet spør etter digitale løysingar.

Tellmann peikar på at kommunane ikkje har fylgt opp med oppdaterte strategiar og prioriteringar for å utnytte potensialet som ligg i IT og digitale løysingar for å effektivisere drifta og utvikle tenestene.  

I analysen vert det anbefalt å styrke både SSIKT og digitaliseringsråda gjennom eit nytt samarbeid med oppdaterte vedtekter og mandat framfor å avvikle samarbeidet. Dette vil krevje ein felles visjon og klare mål for kommunane sitt samarbeid, og ein oppdatert digitaliserings- og IKT-strategi. Eit slikt samarbeid vil sikre kostnadsfordeling basert på forbruk og legg til rette for ulike utviklingstempo blant kommunane. 

Tellmann foreslår også at kommunane styrkar sin digitale kompetanse. Tellmann anbefaler at Vanylven kommune vert invitert til å delta i det nye samarbeidet. 

–  “Tellmann Executive Advisors har gjort ei grundig vurdering av vår noverande IKT-situasjon og har utforska handlingsalternativa for å auke endrings- og effektiviseringstempoet," seier Rune Sjurgard, representant for kommunedirektørane.

– "Vi ser fram til å bruke resultata frå analysen som ei solid plattform for å utvikle ein framtidig strategi for digital transformasjon i kommunane på Søre Sunnmøre.”. 

Link til analysen: Strategisk vurdering for kommunane på Søre Sunnmøre - Analyse og anbefaling Tellmann Executive Advisors 12.06.23 (PDF, 3 MB)