Nina Kvalen er prosjektleiar for Tørn i Volda kommune. Volda kommune

Tysdag 16. september var avdelingsleiarar og seksjonsleiarar i helse og omsorg samla på Samfunnshuset i Volda. Heile sektoren skal i løpet av åtte samlingar evaluere og kartleggje dagens oppgåvedeling og bemanning, for deretter å reorganisere tenestene med ny oppgåvedeling og arbeidsplan. Målet er å finne nye måtar å bruke tilgjengelege ressursar, personalkompetanse, samhandling og arbeidstida på, slik at vi kan møte dei store utfordringane vi står overfor i åra som kjem.

Elsebeth Melle, heimeteneste, Steffen Myklebust, kommuneoverlege, Ann-Sølvi Heltne, institusjonsteneste, Svein Berg Rusten, kommunalsjef, Reidun Elisabeth Sandnes, bu- og habiliteringsteneste, Elin Høydal Vatne, assisterande kommunalsjef og Malene Rovde, rus og psykisk helseteneste. Volda kommune

Kvifor Tørn kommune?

Alle har vi høyrt om det – eldrebølga som vil krevje fleire tilsette i helse og omsorg. Kombinert med færre barnefødslar og dermed færre yrkesaktive, står vi overfor ei umogleg oppgåve: vi får ikkje tak i fleire folk. Helsepersonellkommisjonen uttrykte det slik: «Vi kjem til å gå tom for folk før vi går tom for pengar».

Volda kommune kjenner allereie på utfordringane. Kommunen brukar 30 millionar kroner meir i drifta enn det vi har i inntekter, noko som til no er dekt av sparepengar (disposisjonsfondet). Kvar månad har vi eit underforbruk tilsvarande nesten 100 årsverk, grunna sjukefråvær, permisjonar og vakante stillingar.

Leiarane i helse og omsorg må kvar dag gjere ein stor innsats for å få turnusane til å gå opp. Dette fører til meirarbeid på dei som allereie er på jobb og utløyser overtid, eller vi må leige inn frå bemanningsbyrå. Ein ond sirkel som verkar vanskeleg å bryte.

Frå samlinga der avdelingsleiarane og seksjonsleiarane var samla. Gjennom Tørn-prosjektet skal vi tenke nytt og prøve ut løysingar som gir betre tenester, meir rett bruk av kompetanse og meir stabile arbeidsplanar. Volda kommune

Slik riggar vi arbeidet

Gjennom Tørn-prosjektet skal vi tenkje nytt og prøve ut løysingar som gir betre tenester, meir rett bruk av kompetanse og meir stabile arbeidsplanar. Arbeidet i Volda blir rigga i linja, med ei styringsgruppe, partssamansette grupper og brei involvering frå tillitsvalde og tilsette. Lokal medverknad er heilt avgjerande, og representantar frå både leiing og medarbeidarar er med i styringsgruppa.

Eit av hovudtiltaka i Tørn kommune er å fordele oppgåvene på nye måtar, slik at dei blir løyste med rett kompetanse til rett tid. Det har ført til tydelegare roller for ulike yrkesgrupper.
– Med opplæring kan helsefagarbeidarar gjere mange oppgåver som sjukepleiarar tradisjonelt har gjort, medan tilsette utan helsefagleg utdanning kan utføre andre oppgåver. Når det blir aukande mangel på helsepersonell, er det viktig at kompetansen blir brukt rett, seier prosjektleiar for Tørn kommune i KS, Jorunn Lunde.

– Mange kommunar har gjort vellukka forsøk med turnusar som strekkjer seg over eitt år og med lengre vakter, særleg i helgane. Det gir dei tilsette større moglegheit til å påverke eiga arbeidstid og fritid, samtidig som leiinga kan planleggje betre og kontinuiteten i tenestene blir styrkt.

Bygger vidare på erfaringar

– Vi bygger vidare på erfaringar frå pilotprosjektet i bu- og habiliteringstenesta, seier Nina Kvalen, prosjektleiar i Volda kommune. Pilotfasen gav verdifull innsikt i oppgåvedeling, turnus og organisering, og legg no grunnlaget for ei breiare og meir heilskapleg omstilling i heile sektoren.

Gjennom deltaking i Tørn kommune får Volda kommune støtte frå KS, fagfolk og andre kommunar til å teste ut nye løysingar og dele erfaringar. Dette er eit langsiktig arbeid som skal bidra til å sikre gode og berekraftige helse- og omsorgstenester for innbyggjarane våre.