Helse og omsorg deltek i Tørn Kommune 2025-2026

Deltakinga i Tørn Kommune-programmet er ein viktig del av Volda kommune sitt arbeid med å utvikle ein heiltidskultur i helse- og omsorgstenestene. Gjennom søknaden (PDF, 851 kB) til Tørn 2025–2026 legg kommunen vekt på behovet for heilskapleg omstilling og utvikling i heile sektoren.

Eit felles løft for helse og omsorg
Volda kommune ønsker at alle tenestestader innan helse og omsorg skal vere med i Tørn. Vi ser på dette som ei felles utviklingsmoglegheit, der samarbeid på tvers av tenestene står sentralt.

Saman for berekraftige løysingar
Gjennom Tørn ønsker vi å finne heilskaplege og berekraftige løysingar på utfordringar knytt til:

• Organisering av tenestene
• Oppgåvedeling mellom tilsette
• Arbeidstid og turnusar

Målet er å skape ein meir robust og framtidsretta helse- og omsorgssektor, til det beste for både tilsette og innbyggjarar.

Volda kommune sin deltaking i Tørn er eit delprosjekt i utviklinga av heiltidskultur i helse og omsorg. 

Volda kommune deltek i Tørn Kommune 2024-2025

Volda kommune sin deltaking i Tørn er eit delprosjekt i utviklinga av heiltidskultur i helse og omsorg.  I søknaden (PDF, 3 MB) om deltaking i Tørn Kommune-programmet 2024-2025 tek kommunenutgangspunkt i behovet for omstilling og utvikling i bu- og habiliteringstenesta. Målet er å skape ein meir tilpassa og effektiv teneste for innbyggarane i kommunen.

Om bu- og habiliteringstenesta
Tenesta består av seks seksjonar, og Kleppevegen er valt ut som pilot og første arbeidsplass som deltek i Tørn. Denne pilotfasen er viktig for å teste ut nye arbeidsmetodar og tilnærmingar innan omstillingar i helse- og omsorgssektoren.

Mål for deltakinga
Gjennom deltakinga i Tørn ønsker Volda kommune å oppnå fleire mål, mellom anna:

• Forbetre kvaliteten på bu- og habiliteringstenestene
• Betre tilrettelegging for innbyggarane som nyttar tenestene
• Auke effektiviteten og ressursbruken

Arbeidsgruppe for Tørn-pilot Kleppevegen

STIM-gruppa i Kleppevegen utgjer den partssamansette arbeidsgruppa på arbeidsplassen. I tillegg deltek prosjektleiar for Tørn i Volda kommune, Nina Kvalen. 

STIM står for samarbeid, tryggleik, inkludering og miljø.

Arbeidsgruppe (STIM) Tørn-pilot Kleppevegen; seksjonsleiar, tillitsvald, verneombod og prosjektleiar. Volda kommune

Under Kick-off 2024 fekk vi høyre SINTEF-forskar Marte Pettersen Buvik dele erfaringar frå forsking om Emosjonelle og relasjonelle belastningar i arbeidet, der ho har intervjua barnehagelærarar, lærarar, sjukepleiarar, fysioterapeutar og politi. Hovudfunna viser at medan relasjonar på jobb kan vere positive og meiningsfulle, kan dei også vere svært belastande.

Prosjektgruppa for heiltidskultur tenker at emosjonelle og relasjonelle belastningar kan vere ein årsak til at mange vel å jobbe redusert stilling. Vi følgjer difor opp temaet ved å invitere leiarar, tillitsvalde, verneombod og STIM-gruppene i helse, omsorg og oppvekst til den digitale konferansen Når jobben blir for mye 18. mars 2024.

Innleiarar og tema:

• Psykolog Ellisiv M. J. Horrel: Hjelperens utfordringer
• Unio v/Henrik Dahle: Hvem sine rettigheter teller mest
• Arbeidstilsynet v/Ingri Litleskare: Hva slags verneutstyr har vi mot emosjonelt belastende arbeid
• Kvinnehelse i Sanitetskvinnene v/Liv Bjørnhaug Johansen: Når livet gjør oss syke - overbelastning i et kvinneperspektiv
• Senter for Stress og Traumepsykologi v/Rune Stuvland: Kollegastøtte - slik gjør du det

Deltakarane såg konferansen samla på Uppheim og avslutta dagen med gruppearbeid om korleis jobbe vidare med tema i Volda kommune.

Når jobben blir for mye - korleis jobbe vidare i Volda kommune.. Gruppearbeid 18.03.2025.

Onsdag 7. februar 2024 deltok STIM-gruppene frå helse og omsorg, barnehage, skule og reinhald på Kick-off 2024 for Heiltidskultur i Volda kommune.

Eitt år etter oppstarten av heiltidskulturprosjektet samla vi dei same deltakarane for å oppsummere erfaringane frå det første prosjektåret.

Vi fekk besøk av fleire eksterne innleiarar: Fafo-forskar Leif E. Moland delte ny forsking om heiltidsøkonomi, Siril Solberg Linde frå KLP snakka om konsekvensane av deltid for framtidig pensjon, og Sintef-forskar Marte Pettersen Buvik delte forsking om relasjonelle og emosjonelle belastningar i arbeidet. Dagen vart avslutta med gruppearbeid og dialog om vegen vidare i prosjektet.

Politikarar, leiarar, hovudtillitsvalde, prosjektgruppa for Heiltidskultur og Fafo-forskar Leif E. Moland under Kick-off 2024. Volda kommune

Program Kick-off 2024

Aktuelle linkar:

• https://www.fafo.no/zoo-publikasjoner/hva-koster-heltid-egentlig
• https://www.sintef.no/publikasjoner/publikasjon/2209731/
• https://www.klp.no/pensjon/offentlig-tjenestepensjon/alderspensjon/lurt-a-vite-hva-deltid-betyr-for-pensjonen
• https://www.klp.no/pensjon/hvilke-valg-om-jobb-og-penger-pavirker-pensjonen-din
• https://www.klp.no/pensjon/offentlig-tjenestepensjon/a-jobbe-deltid-pavirker-pensjonen-din
• https://www.klp.no/artikler/seniorer-som-en-ressurs--ikke-problem

Som del av satsinga på heiltidskultur for å sikre betre kvalitet i tenestene, større stillingar og meir kontinuitet i bemanninga, starta vi eit kompetanseløp for tilsette i helse og omsorg våren 2023. Målet var å oppnå betre og meir berekraftig oppgåvedeling gjennom opplæring i oppgåvekartlegging og redesign. 

Opplæringa vart gjennomført av KS Konsulent i mai og juni 2023, med Hornindal omsorgssenter og heimeteneste som pilot. STIM-gruppa frå dei to tenestene, observatørar (leiarar og tilsette) frå andre tenester i helse og omsorg, og prosjektgruppa for heiltidskultur deltok aktivt i opplæringa.

Oppgåvekartlegging i Heimetenesta i Hornindal 2023. Volda kommune

Torsdag 9. februar 2023 vart oppstartssamling for prosjektet med Heiltidskultur i Volda kommune. 

Politikarar, leiarar, hovudtillitsvalde, hovudverneombod og STIM-gruppene i helse og omsorg, barnehage, skule og reinhald deltok. 

Kick-off 2023 markerte starten på eit arbeid og eit samarbeid til det beste for tenestemottakar, tilsette og arbeidsgivar. Volda kommune har høg andel deltidstilsette. Det ønsker vi å gjere noko med. 

Torsdag 9. februar 2023 gjekk startskotet for prosjektet Heiltidskultur i Volda kommune. Volda kommune

Kvifor heiltidskultur?

Det er mykje forsking og kunnskap som syner at heiltidskultur og store stillingar vil gje stor positiv verdi, både for arbeidsgjevar, arbeidstakarar og framfor alt for innbyggjarar og brukarar.

Mykje deltid påverkar kvaliteten for brukarane. Heiltid vil gjere det lettare å utvikle gode fagmiljø og tilby tenester av god kvalitet. Heiltid er viktig for å rekruttere og behalde kvalifisert fagpersonell, og løyse rekrutteringsutfordringar for berekraftig tenesteutvikling.

Tema på samlinga:

• Heiltidserklæring
• Heiltidsplakatar
• Frå deltid til heiltid
• Heiltidskultur - kva og kvifor?
• Utfordringar og løysingsforslag
• Korleis lykkast i helse og omsorg?
• Korleis tenke nytt om turnusarbeid? 

Program Kick-off 2023

Eksterne innleiarar:

Leif E. Moland: Forskar i Fafo innanfor område som innovasjon, organisasjonsutvikling, lean, arbeidstid, turnus, heiltids-/kompetansekultur, arbeidsmiljø og tenestekvalitet.

Kari Ingstad: Professor i sosiologi ved Nord universitet, Fakultet for sykepleie og helsevitenskap. Ho er utdanna sjukepleiar, har hovudfag frå Universitetet i Oslo og ein doktergrad frå NTNU, Trondheim. Ho har forska på tema knytt til arbeid, arbeidsvilkår, arbeidstidsorganisering, organisasjon, leiing, innovasjon, samhandling, heiltidskultur og turnus.

Geir Johan Hansen: Seniorrådgivar i KS-Konsulent og har sidan 2012 arbeidd med heiltidskultur og bemanningsleiing i nasjonale, regionale og lokale satsingar. I samarbeid med Leif E. Moland, har han leia fleire nettverk i den nasjonale satsinga «Sammen om en bedre kommune».

Jo Fiske: Spesialrådgivar i KS-Konsulent og arbeider spesielt med samhandling og korleis betre bruk av ressursar og kompetanse kan gi bidra i livsmeistringsoppdraget for barnet/eleven, og korleis kommunen kan lykkast med sine oppgåver ved å sørge for god kvalitet i alle ledd.