Privatpersonar, forslagsstillar, organisasjonar eller andre styresmakter kan fremme forslag til nye reguleringsplanar eller endring av eksisterande planar.  

Krav til planprosessen  

I samsvar med plan- og bygningslova (pbl) § 12-8, skal det før oppstart av reguleringsplanar gjennomførast eit formelt oppstartsmøte. Seinast samstundes med tinging av oppstartsmøte, skal forslagsstillar sende planinitiativ til kommunen. Kunngjering og varsel om oppstart av planarbeid kan ikkje skje før kommunen har gitt forslagsstillar skriftleg løyve til det.  

Planinitiativ – forslagsstillar sine førebuingar  

Planinitiativet skal i nødvendig grad omtale premissane for det vidare planarbeidet, og gjere greie for følgjande:  

• føremål med planen  
• planområdet og om planarbeidet får verknader utanfor planområdet  
• planlagd busetnad, anlegg og andre tiltak  
• utbyggingsvolum og byggjehøgder  
• funksjonell og miljømessig kvalitet  
• tiltaket sin verknad på, og tilpassing til landskap og omgjevnader (stadanalyse)  
• forholdet til kommuneplan, eventuelle gjeldande reguleringsplanar og retningsliner, og ev. pågåande planarbeid  
• vesentlege interesser som vert råka av planarbeidet  
• korleis samfunnssikkerheit skal ivaretakast, bl.a. gjennom å førebyggje risiko og sårbarheit  
• råka offentlege instansar og andre interesserte som skal varslast om oppstart  
• prosessar for samarbeid og medverknad frå råka fagmynde, grunneigarar, festarar, naboar og andre råka  
• vurdering av om planen er omfatta av forskrift om konsekvensutgreiingar, og korleis krava ev. vil ivaretakast  

Planinitiativet skal sendast inn samstundes med tinging av oppstartsmøte (pdf).   

 Volda kommune gjer merksam på at reguleringsplanar, herunder planinitiativ, skal utarbeidast av fagkyndige, jf. pbl § 12-3.  

Kommunen sine førebuingar  

Kommunen går gjennom planinitiativet og kallar inn til oppstartsmøte.  

På bakgrunn av innsendt materiale, vil saka få ei grundig tverrfagleg vurdering før møtet. I tillegg vil andre råka partar bli informert om møtet.  

Føremål med oppstartsmøte  

• Legge til rette for ein meir effektiv og forutsigbar planprosess.  
• Viktige føresetnader for planarbeidet skal avklarast.  
• Raskare sakshandsaming og betre sluttresultat.  

Gjennomføring av oppstartsmøte  

Forslagsstillar skal alltid møte saman med utførande plankonsulent, jf. krav om fagkyndigheit i § 12-3 siste ledd i plan- og bygningslova.  

I oppstartsmøtet skal alle tema som er nødvendig for å klargjere føresetnadane for det vidare planarbeidet og utforminga av det endelige planforslaget handsamast. Det skal blant anna takast stilling til:  

• korleis det skal leggjast til rette for samarbeid, medverknad og samfunnssikkerheit  
• om planen blir omfatta av forskrift om konsekvensutgreiing og korleis det vidare opplegget skal vere for arbeidet fram til ev.utgreiing ligg føre.  
• om det skal utarbeidast andre utgreiingar om bestemte tema, og om kommunen eller forslagsstillar skal utarbeide desse  
• om det er føremålstenleg med felles handsaming av plan- og byggesak etter plan- og bygningslova § 12-15  
• kva kommunen skal bidra med i planarbeidet  
• om det er behov for seinare dialogmøte mellom forslagsstillar og kommunen  
• overordna framdriftsplan for planarbeidet  
• kontaktpersonar hos forslagsstillar og i kommunen  
• om det er aktuelt å stoppe planinitiativet etter plan- og bygningslova § 12-8 andre ledd.  

Kommunen utarbeider referat frå oppstartsmøtet. Referat skal sendast til konsulent innan rimeleg tid etter møtet.  

Etter at referatet er godkjent, skal konsulent søkje om oppstart av reguleringsplanarbeid. Søknaden vert lagt fram for formannskapet, som tek stilling til om arbeidet kan starte.  

Avgjerd om at planinitiativet skal stoppast  

Dersom kommunen kjem fram til at eit privat planinitiativ ikkje bør oppstartast, kan ein stoppe  initiativet, jf. pbl § 12-8, 2. ledd. Avgjerda skal takast så tidleg som mogleg i oppstartsfasen, og om ikkje anna er avtala, seinast 14 dagar etter at oppstartsmøte er halde. Avgjerda kan ikkje påklagast, men forslagsstillar kan krevje å få saka lagt fram for kommunestyret til endeleg avgjerd.  

Gebyr  
Kommunen tar gebyr for handsaming av private reguleringsplanar. Lenke til “Kva kostar det?” 

Forskrift om behandling av private forslag til detaljregulering etter plan- og bygningslova:  

https://lovdata.no/dokument/SF/forskrift/2017-12-08-1950