OPPDATERING ONSDAG 31.01.24 – kl. 16.00

Farevarselet er nedgradert frå raudt til oransje for ytre strøk, og frå oransje til gult for indre delar av Møre og Romsdal. Det kan framleis kome svært kraftige vindkast utover kvelden og natta.

Normal skuleskyss frå torsdag morgon

Møre og Romsdal fylkeskommune melder om at det vert normal skuleskyss i morgon, torsdag 1. februar. 

Basert på vêrvarselet frå Meteorologisk institutt er det gjort vurderingar som tilseier at det vil gå normal skuleskyss i Møre og Romsdal frå torsdag morgon.

Stor skredfare fredag 2. februar

NVE melder om at det vil bli stor skredfare fredag, grad 4. Følg med på varsom.no for oppdatert informasjon.

OPPDATERING ONSDAG 31.01.24 – kl. 11.00

Varsel om ekstremt kraftige vindkast som er ventande frå i ettermiddag.  Kommunen har sett krisestab og gjer førebuande tiltak. 

Det er usikkert kor sterke kasta kan verte i vårt område, men vi må alltid vere budde på at kommunikasjonssamband og vegsamband kan falle ut i situasjon med ekstremt sterk vind. Vi oppmodar alle om å sjå til naboen og då særskilt eldre personar i nabolaget. Ved ekstremvêr kan tryggleiksalarmar miste sambandet.

Kommunen har oppmode leiarane av grendelaga om å følgje med på situasjonen og ev setje i gang lokale lågterskeltiltak om det skulle verte nødvendig. Dette gjeld særleg å sjå til om det er innbyggjarar som treng særleg tilsyn eller hjelp. Grendalaga har ei viktig rolle og kan vere kontaktpunkt dersom kommunikasjonen fell ut.

TILTAK:

• Kriseleiinga har beslutta å stenge Mork, Dalsfjord og Folkestad skular i dag kl 12.00. Skyss vil gå så raskt som det let seg gjere etter kl. 12.00.

Desse skulane vert ikkje stengt men skuleskyssen er framskunda for elevar ved: 

Hornindal skule (til Bjørke, Fyrde og Høydal)

Bratteberg skule (til Hjartå)

Volda ungdomsskule (til Hjartå og Mork/Lid)

Dei blir sendt heim ca kl 12.20

• Kulturskulen vert stengt i dag grunna potensiell fare i ettermiddag. 
• Ein rår til at dei yngste elevane ved Øyra, Bratteberg og Hornindal skule ikkje går heim åleine eller skule/SFO.
• Barnehagane i Volda held ope som normalt. Det vert sendt ut melding dersom denne vurderinga vert endra.
• Ungdomsrådet 31.01.24 vert avlyst.
• Personvernmarkering på Spinneriet vert avlyst.
• Utvalsmøte for oppvekst og kultur vert avlyst, utsett til 14. februar (Oppdaterting kl 12.00)
• Dagsenteret held ope som vanleg. 
• Legesenteret tek imot pasientar som vanleg. 

Alle må sikre lause gjenstandar på sine eigedomar. Unngå å opphalde seg ute når det er sterk vind då det kan vere farleg på grunn av lause gjenstandar i lufta. 

Hugs beredskap i eigen heim. Du er ein del av beredskapen i Noreg.  

https://www.sikkerhverdag.no/din-beredskap/hendelser-og-kriser/beredskap-i-hjemmet/

Dette er grendautvala i Volda: https://www.volda.kommune.no/tenester/paverknad-og-politikk/grendautval/

Beredskap i sektorane:

Samfunnsutvikling:

Avdeling Vatn og avløp har sjekka veg, avløp og kummar og held seg i beredskap utover dagen og natta. Avdeling Eigedom har sikra kommunale bygg så langt det let seg gjere, og vil ha beredskapsvakt under uvêret. Seksjon Drift har mellom anna sjekka aggregat og gjort dei klar til drift ved behov. 

Helse og omsorg:

Tryggleiksalarmar kan dette ut. Vi oppmodar at naboar og andre er merksame og held eit auge med personar dei veit om i nabolaget .

Dei som bur ute i bygdene og skal ha middag frå helse og omsorg, vil få framskynda leveranse og få denne levert tidlegare på dag. 

Heimetenestene har gjort førebuande tiltak. Hjelpetrengande personar som bur særskilt utsett har fått tilbod om å bli flytta.

Heimetenesten køyrer ut som vanleg på heimebesøk, så lang som mogleg. 

Søre Sunnmøre legevakt har gjort tiltak og har beredskap både på ytre Sunnmøre og indre. Det er også mogleg å setje opp legevakt i Hornindal–området dersom vegen mellom Volda sentrum og Hornindal skulle bli stengt. 

Kriseleiinga i Volda skal ha nytt møte kl  15.00, eller før ved behov. 

OPPDATERING ONSDAG 31.01.24 – kl. 09.00 

Kriseleiinga har beslutta å stenge Mork, Dalsfjord og Folkestad skular i dag kl 12.00. Skyss vil gå så raskt som det let seg gjere etter kl. 12.00.

Kulturskulen vert også stengt i dag grunna potensiell fare i ettermiddag. 

Ein rår til at dei yngste elevane ved Øyra, Bratteberg og Hornindal skule ikkje går heim åleine eller skule/SFO.

TYSDAG 30.01.24, kl 18.00

Det er varsla raudt farevarsel for delar av Møre og Romsdal. Volda ligg i indre strøk av fylket og har varsel på oransje nivå, men det kan kome svært kraftige vindkast.

Ekstremvêret Ingunn er varsla frå onsdag ettermiddag. Det er venta orkan i tillegg til ekstremt sterke vindkast.

Det er venta betydelige nedbørsmengder og snø utover kvelden i morgon og natt til torsdag. Det er i tilllegg varsla svært ustabile forhold med lyn og torden i området.

Barnehage og skule

Føresette til barn i barnehage og skule får melding direkte gjennom barnehagen/skulen sitt meldingssystem dersom barna skal halde seg heime. 

I samband med at det er sendt ut farevarsel om ekstremt kraftig vind, rår oppvekstkontoret til at dei minste barna skal få følge heim onsdag.

– Vi held SFO, skular og barnehagar opne, men oppmodar om at dei yngste skal sleppe å gå heim aleine, seier kommunalsjef oppvekst Per Ivar Kongsvik.

– Ikkje trygt å vere ute, seier meteorologane. 

Meteorologisk institutt varslar om ekstremt kraftige vindkast på raudt nivå for ytre strok av Møre og Romsdal, indre strok av fylket har varsel på svært kraftige vindkast (oransje nivå). Frå onsdag ettermiddag til torsdag morgon ventast orkan på kysten. 

Les meir om varselet her: Ekstremværet “Ingunn” gir ekstremt kraftige vindkast i deler av Møre og Romsdal, Trøndelag og Helgeland (met.no)

Meteorologisk institutt

Råd som gjeld frå onsdag kveld

• hald deg inne
• følg råd frå beredskapsmynde
• om du MÅ køyre, følg råd frå Statens vegvesen og sjekk vegmeldingar (www.175.no)
• følg råd og sjekk status frå transportaktørar
• gjer heimen klar for eit potensielt lengre straumbrot
• ver forsiktig om du ferdast i strandsona eller på sjøen
• vurder tiltak for å avgrense skade

Konsekvensar

• det er farleg å vere ute, og det er venta uvanleg stor skade på bygningar, infrastruktur, skog og straumnett
• stor fare for innstilte flyavgangar, båtar og anna transport
• bruer kan verte stengde
• takstein og takplater kan blåse av hus og bygningar
• du må vente svært mykje lenger reisetid
• straumforsyninga lokalt kan verte påverka
• mange vegar kan verte stengde på grunn av tre eller andre objekt i vegbana
• snøfokk i fjellet gir redusert sikt
• du kan vente kolonnekøyring og/eller stengde vegar
• høge bølger kan gi skade på infrastruktur og bygningar i strandsona