Frå venstre: Vigdis Støylen og Hanna-Sølvi Lillås, leiar i Volda sanitetslag, saman med Kari-Janne Ljones Kulø, avdelingsleiar for barn og familie, og Silje Hjellbakk Hole, Iselin Steinnes Foldal, Vilde Humberset Bell-Hagen og Palma Kristin Håvik frå same avdeling. Dei tilsette ved helsestasjonen sette stor pris på den flotte gåva. Volda kommune

Fine gåver til helsestasjonen frå sanitetslaga

Helsestasjonen i Volda har fått 10 000 kroner frå Volda sanitetslag til trivselstiltak for barn, ungdom og føresette. I tillegg har Austefjord sanitetslag gitt heimelaga, strikka lommevennar som skal glede dei som kjem til helsestasjonen.

Volda sanitetslag v/leiar Hanna-Sølvi Lillås og Vigdis Støylen, besøkte helsestasjonen 24. september for å overrekkje ei gåve på 10 000 kroner til avdeling barn og familie. Pengane skal nyttast til trivselstiltak i ulike gruppetilbod for barn, ungdom og føresette.

Helsestasjonen har fleire gruppetilbod som skal bidra til meistring, god psykisk helse og gode relasjonar. Målet er å gi barn og ungdom støtte til å møte utfordringar i kvardagen, og å styrke foreldra i foreldrerolla.

Gåva frå sanitetslaget skal mellom anna nyttast til aktivitetsutstyr, spel og enkel servering under gruppesamlingane. Dette er tiltak som kan bidra til å skape gode og trivelege rammer for deltakarane.

Strikka lommevennar frå Austefjord sanitetslag

Helsestasjonen har også fått ei hyggeleg gåve frå Austefjord sanitetslag, ved leiar Marie Måen. Medlemmene har strikka små lommevennar som dei ønskjer å gi til helsestasjonen.

Dei fargerike, heimelaga lommevennane er ei fin gåve som kan spreie glede og gi litt ekstra omsorg i møte med barn og unge.

Desse fargerike, handstrikka lommevennane har helsestasjonen fått i gåve frå Austefjord sanitetslag. Ei hyggeleg gåve som kan spreie glede og gi ekstra tryggleik og omsorg til barn som kjem til helsestasjonen. Volda kommune

Avdeling barn og familie set stor pris på begge gåvene og engasjementet sanitetslaga viser.

– Vi er svært glade for desse gåvene. Det betyr mykje at frivillige engasjerer seg og ønskjer å bidra til trivsel og gode opplevingar for barn, ungdom og familiar som nyttar tilboda våre, seier Kari-Janne Ljones Kulø, avdelingsleiar for barn og familie.
 

Volda kommune rettar ein stor takk til både Volda sanitetslag og Austefjord sanitetslag for omtanken og dei fine bidraga.