Erlend Sporstøl Vikestrand

Kvifor jordvern?

Å lage matjord tek tusenvis av år. Volda og Ørsta kommunar er to av dei største landbrukskommunane i Møre og Romsdal, og har ei viktig rolle for matproduksjonen i fylket. Samtidig står kommunane på Søre Sunnmøre jamleg overfor utfordringar der større og mindre landbruksareal vert vurdert til utbygging, infrastruktur og andre formål.

Dei nasjonale jordvernmåla har blitt strengare. I jordvernstrategien som Stortinget vedtok i 2023, er målet for omdisponering av dyrka mark sett til maksimalt 2000 dekar per år. Kvifor er jordvern viktig? Og korleis skal vi følgje opp dette i kommunane?

Med støtte frå Landbruksdirektoratet og Statsforvaltaren i Møre og Romsdal, inviterer vi politikarar, næringslivet, jordeigarar, faglag, bondelag, kommunetilsette og andre interesserte på Søre Sunnmøre til ein dag med innsikt, diskusjon og fagleg påfyll. Konferansen er eit ledd i arbeidet med den kommunale jordvernstrategien.